Barabara Ya Nronga Yazinduliwa,Yatatua Changamoto

Imetumwa: January 19th, 2026

Wananchi wa Kijiji cha Nronga , Kata ya Machame Magharibi wilayani Hai mkoani Kilimanjaro, wameondokana na adha ya muda mrefu ya miundombinu mibovu  mara  baada ya kukamilika kwa ujenzi wa barabara ya  Kalali - Nronga iliyokuwa kero kwa miaka mingi, hususan wakati wa mvua, hali iliyokuwa ikiwalazimu kutembea umbali mrefu kufuata barabara mbadala.

Wananchi wameeleza furaha yao wakisema kukamilika kwa barabara hiyo kutarahisisha usafiri na usafirishaji, kuokoa muda, kupunguza gharama za maisha pamoja na kuongeza fursa za kiuchumi, ikiwemo usafirishaji wa mazao ya kilimo na kuwafikia kwa urahisi huduma muhimu kama afya na elimu.

Akizungumza mara baada ya kuzindua rasmi barabara hiyo, Diwani wa Kata ya Machame Magharibi, Mh Martin Munisi, amesema awali barabara hiyo ilikuwa korofi kiasi cha kusababisha ajali na hata kupoteza maisha, huku wananchi wakilazimika kuzunguka umbali mrefu ili kufika mjini kutokana na ubovu wake.

Munisi ameipongeza Serikali kwa hatua hiyo, huku akiomba kukamilishwa kwa Mita  200 zilizosalia ili barabara hiyo itumike kikamilifu kwa mwaka mzima, jambo litakalowezesha wananchi wa Machame Magharibi kuendelea na shughuli zao za kiuchumi kwa urahisi na usalama zaidi.

Akizungumza kwa niaba ya meneja TARURA wilaya ya Hai Mhandisi Christopher Deogratius amesema ujenzi wa barabara ya changarawe yenye urefu wa kilomita 6 katika maeneo ya milimani ya Kalali Nronga, pamoja na uwekaji wa mitaro na tabaka la zege katika mita 400, huku zilizotekelezwa kwa gharama ya shilingi milioni 448, fedha zilizotolewa na Serikali kupitia Halmashauri ya Wilaya ya Hai.